Collection(s) : Occitania e Gasconha de Oei
Paru le 05/07/2023 | Broché 161 pages
Itinerari d'un resistent
E mai se de costuma Sèrgi Viaule prèsa gaire parlar d'el, un còp de mai aquò's sa volontat militanta que lo butèt a escriure aqueles troces autobiografics. Non pas per « se passar la bròssa de relusir sus l'ego », coma o ditz tan plan dins son prefaci, mas perque sa « sola ambición es de relatar una acción militanta pel menut, de far òbra de testimoniatge per las generacions actúalas e futuras d'occitanistas ».
Dins aquel libre se presenta clarament coma nacionalista e coma résistent a la francisacion d'Occitania. Cadun se farà son idèia suis combats que menèt dins sa vida. Ni per tot,cadun retendrá qu'es un deis rares occitanistas a aver butat sas conviccions fins a conéisser las jaulas de l'Estat francés.
Lo relat de son itinerari de vida participa a l'escritura de l'istòria, fins ara pauc documentada, del movement occitanista de las annadas 1970-1980. Son testimoniatge es d'ont mai precios per las generacions venentas d'occitanistas qu'elas devon dobrir d'autras dralhas de resisténcia adaptadas ais temps que son los nòstres. Se conéisser l'istòria es indispensable per analisar lo present, de cap de biais pot pas èsser un modèl per l'avenidor. A l'ora d'Internet d'autres metòdes d'accions radicalas devon èsser inventats. D'aqui l'importància de conéisser las experiéncias de nòstres davancièrs. Aquesta n'es una demest plan maitas.
Sèrgi Viaule es sortit d'Albigés e i demòra. A escrich poësias, novèlas e romans. Sa singularitat dins lo cortal de la literatura nòstra es qu'a publicat forces racontes de viatges : Escorregudas en Albigés, Passejada en Escandinavia,Sus las pesadas de Robèrt-Lois Stevenson, Barrutlada en Irlanda e en Gallas, etc. E mai nos porgís a nosautres los legidors del sègle XXIen un occitan natural,de bon comprene, enrasigat dins sa pratica quotidiana de la lenga.
