Collection(s) : Prosa occitana
Paru le 15/10/2015 | Broché 140 pages
« Es pas un sentiment de vertigi que me pren, mai puslèu d'inexisténcia fonsa. De me sentir agachat, e ren mai que resultanta negativa d'aquel agach, me perde a ma quita consciéncia. Siáu pas mai que bronzinament a s'enanar, que velha silenciosa. Coma la flamba de la candela, quand s'es amorsada e que demòra dins l'espaci de sa clartat passada la memòria pichòta de son estre tan tèune. Ma consciéncia benlèu. Sa manifestacion darriera abans que s'enfonze, immateriala, dins lo flume badier dau temps. Es benlèu aquò que cerque, fin finala, dins mei contemplacions atrabalhidas deis espacis celestiaus. L'oblit de çò que siáu, la reduccion de ma paura consciéncia d'estre a la d'un ponch que se 'n vai, d'una lusor que morís pauc a cha pauc e que serà lèu pas que lo signe d'una vida per sempre finida. Lo cèu, alara, seriá mon ataüt, mon potz de nonren, mon linçòu d'existéncia... »
Fins ara, coneissiam Felip Gardy mai que mai coma poèta. Ara dona a legir un trentenat de pròsas cortas, ineditas o escampilhadas en revistas, que nos revèlan un mond insolit.
Presentan de narrators sens identitat ni passat, d'existéncias malseguras, en perilh de se fondre coma de sucres dins l'ocean de lor agach coma d'avugles dins la nuèch, agachaires se dissolvent dins l'objècte agachat, coma « l'astronòm inagotable » que se pèrd dins los espacis infinits. Cada narracion es coma l'arrèst sus imatge progressiu d'un filme que quitariá pas de s'alentir e de s'escafar, un vam paradoxal cap a l'immobil, coma un fèrre roge espinchat al moment que se tira del fuòc fins al palliment definitiu. Aquelas pròsas contan pasmens d'eveniments extraordinaris, d'apocalipsis per extincion, de negadas dins lo nonrés coma dins un element liquid, granda lutz eissorbanta, tenèbras pastosas o color unica qu'envasís tot lo mond.
Aquò's una autra fàcia de l'escrivan que descobrissèm aicí, fantastica totjorn, tot còp inquietanta, sovent plena d'umor, escricha dins una lenga d'un classicisme perfièch.
