Paru le 05/12/2013 | Broché 149 pages
revirat dau francès per Marie-Christine Coste-Rixte, amb l'ajuda amistosa de Roger Pasturel
«A son trin, tièra a cha tièra, Minà talha lei brancas bassas dins lei rabassièras de la Grenòbla. Lo travalh es long e fastigós. L'abséncia de Juli li pèsa. Liona la seguís fidelament. Van sus plaça en passant per lo sèrre sablós e mai d'un còp la canhòta tròba encara una rabassa negra entardierada.
- Vòudriáu ben m'ofrir una aumeleta, mai sariá una ofensa a Felip !
Aquò, jamai lo sofririá !
Alara Minà se congosta de rabassas crudas».
Siam dins lo sud de Droma. A l'entorn de Minà, la joina eroïna berbèra, personatge centrau d'aqueste roman, trobam son òme, Felip, qu'es païsan, e Juli, son sògre, un afogat de la rabassa. L'istòria se nosa entre elei tres, que vivon a tòca-tòca dins una granja solitària. Juli ensenha a Minà tota sa sciénça rabassièra.
Pamens, un secret pesa sus aquesta familha, escondut tant fons dins leis estres coma la rabassa sota tèrra. Minà fai son enquista e tanben cerca lei diamants negres amb sa brava canhòta Liona.
Filha e felena de rabassaires de Droma provençala, Nicòla Faucon-Pellet es secretària de l'Association des Écrivains et Artistes Paysans, emai l'autora d'un detzenat d'àutrei libres.
Marie-Christine Coste-Rixte, nascuda a Vauriàs (Vau-clusa), professor agregat d'anglès a la retirada, faguèt la revirada en provençau. Sòcia de l'Institut d'Estudis Occitans, de l'Association Internationale d'Études Occitanes e vici-presidenta dau PEN-club de lenga d'òc (Region Ròse-Aups).
