Paru le 07/11/2013 | Broché 251 pages
Public motivé
Richard Price ku Sally Price puu di buku a Ingisitongo ko a Saamakatongo | Vinije Haabo heepi fu seeka di Saamakatongo ko moo gbelen gbelen
Fesiten
Richard Price ku Sally Price puu di buku a Ingisitongo ko a Saamakatongo. Vinije Haabo heepi fu seeka di Saamakatongo ko moo gbelen gbelen
Di buku aki de a Ingisitongo sensi di yaa 1983, noo a de a Faansitongo sensi 1994. Awaa ufo u ko mbei en a Saamakatongo ! (A Ingisi de kai en « First-Time, » noo a Faansi a de « Les Premiers Temps. »)
Hafu u di buku da dee oto fu dee gaanwomi, fa mi ku de bi sindo taki fesiten sondi a dee yaa 1960 ku 1970 - dee sembe kuma Gaama Agbago Aboikoni ; Tebini fu Kampu ; Kabiten Alafo fu Kambaluwa ; Ameekan fu Piki Seei ; Anikei Awagi fu Semoisi ; Basia Bakaa ku Kabiten Bayo fu Botopasi ; Kabiten Dangasi (Kala), Hedikabiten Faansisonu, Peleiki, ku Otyutyu (Belifon) fu Dangogo ; Kabiten Come fu Tutubuka ; Metisen fu Langu ; Basia Lantifaya fu Masiakiiki ; Tembai fu Maipa ; ku someni oto gaanwomi.
Hii dee Saamaka oto dee yoo lesi a di buku aki, mi bi tei de wante wante a di teipi masini mi bi abi a Saamaka. Noo, fu mbei di buku mi bi musu feni hiniwan u de a dee awoo teipi palati, bee mi sa sikifi en pisisi kuma fa di sembe bi taki en ku buka. Noo wan oto pisi u di buku ta taki fa dee bakaa bi konda dee fesiten sondi fu Saamaka.
Gaanse u dee sembe dee da mi fesiten oto an de a u mindi moo. Noo di wooko fu mbei di buku ta da tyali a di pisi de. Ma a suti da mi tu biga fesiten oto da wan gaan gaan sondi u mundu. Hen mi begi dee moo nyonku sembe, bee de go sindo ku dee gaansembe tya di wooko aki go moo fesi.
Richard Price (Saamaka sembe kai hen « Lisati ») da wan gaan leeima fu Ameekankonde. A buta sembe a universiteit a someni konde : na Ameekankonde ; na Faansi ; na Balazili. A sikifi moo tuwenti buku ku saamaka sondi a dendu, sensi hen ku hen muyee Sally fosu go a Saamaka a dee yaa 1960. (I sa si dee buku na www.richandsally.net) Te tidedaka, a ta wooko tanga ku Gaama Belifon ku di VSG mbei dee Saamakanenge feni di goon u de. Fa u de aki, Lisati ku Sally ta libi a Matiniki.
