Paru le 15/09/2003 | Broché 218 pages
Ne oa ket Yann Duff, mestr Kafe Braz ar Porz, e Landerne, evid kredi e zaoulagad. Bez' e oa dirazañ, e-barz an ostaleri, eur paotrig eiz vloaz deuet da brena madigou gand arhant saoz. Eur billed braz, hanter-kant lur saoz anezañ, e-noa ar paotrig lakeet ablad war ar hontouer. Eun toullad billiji all a oa gantañ en e chakot.
«E peleh out bet, Yannig Mazeaz, o laerez ar billiji-ze ?», a houlennas Yann Duff.
«N'on ket bet o laerez anezo, Eontr. O havet ameus e-touez ar bern trêz a welez a-hont, war ar hae. O klask kregin e oan, e-touez an trêz, asamblez gand va henderv, Pèrig Mazeaz, pa 'z om kouezet war ar billiji-ze.»
«Luriou saoz e-touez an trêz ! Boulhast ar gurun ! Ha diskoachet e vefe ganit teñzor Rakam e Vleo Ruz ? Deus da ziskouez an dra-ze din 'ta, va niz.»
Ha Yann Duff o vond gand ar paotrig war-gaoud ar bern trêz bet diskarget war ar hae gand ekipaj ar Vari Vorgan, eur vag sevel-trêz, euz Brest, perhennet gand Pèr Toullgoad.
En ostaleri e oa ivez ar homiser Kaou Kemener. Klevet e-noa ar gaoz a oa bet etre an daou all. Setu ma yeas er-mêz d'o heul, ha da deurel eur zell ouz trêz burzuduz ar Vari Vorgan.
